Ա․Ղազարյանը մասնակցեց EMERGE ծրագրի համակարգող մարմնի նիստին

Հրապարակված է դեկ 23, 21

Միգրացիոն ծառայության պետ Արմեն Ղազարյանն այսօր մասնակցեց ՄԱԿ-ի միգրացիայի միջազգային կազմակերպության «Հայաստանում և Վրաստանում միգրանտների իրավունքների և լավ կառավարման խթանում» (EMERGE) ծրագրի համակարգող մարմնի 2-րդ նիստին։

«Ծրագրի շրջանակում հետազոտվել է իմիգրացիոն հոսքերի վերաբերյալ հայկական մեդիա տիրույթը, և մենք անհամբերությամբ սպասում ենք վերլուծության արդյունքներին, քանի որ սա մեզ համար կարևոր է նաև օտարերկրացիներին աշխատանքի թույլտվության նոր համակարգի ներդրման համատեքստում»,-ասաց Ա․ Ղազարյանը՝ նշելով նաև ծրագրի շրջանակում Հայաստանից կամավոր վերադարձի ուղղությամբ իրակացվող աշխատանքների մասին, մասնավորապես կարևորելով ոլորտի իրավական հիրմքերի ձևավորումն ու ամրապնդումը։

Ծառայության պետը ընդգծեց նաև ՔՈՎԻԴ-19 համավարակի պայմաններում վերաինտեգրման, վերադարձի և աշխատանքային միգրացիայի վերաբերյալ տարածաշրջանային երկրորդ թեմատիկ համաժողովի արդյունավետությունը, որն ընթացիկ տարում հաջողությամբ կազմակերպվել և անցկացվել է Երևանում նոյեմբերի 15-16-ը։

Ինտերակտիվ ամանորյա միջոցառում՝ փախստական երեխաների համար

Հրապարակված է դեկ 22, 21

Միգրացիոն ծառայության և Վերադարձի և վերաինտեգրման եվրոպական ցանցի աշխատակազմի համագործակցությամբ ՄԾ ինտեգրման կենտրոնում տեղի ունեցավ ինտերակտիվ ամանորյա միջոցառում՝ հանրակացարանային շենքերի և Հատուկ կացարանի բնակիչ երեխաների մասնակցությամբ:

Միջոցառումն անցավ հոգեբանի մասնակցությամբ, ով երեխաների հետ ակտիվ շփման միջոցով վեր հանեց նկատած հարցերը՝ հետագայում նրանց հետ աշխատանքները մասնագիտորեն շարունակելու նպատակով։

Երեխաները մասնագետների օգնությամբ պատրաստեցին տոնածառի ձեռագործ խաղալիքներ՝ տոնական զարդանախշերով։ Հյուրասիրության ընթացքում երեխաները հոգեբանին պատմեցին երազանքների, ապագա մասնագիտության վերաբերյալ իրենց պատկերացումների մասին, պատասխանեցին նրա հարցերին։

«Ճամպրուկ 2021»-ի շրջանակում պարգևատրվեցին 9 լրագրողներ

Հրապարակված է դեկ 18, 21

Միգրանտների միջազգային օրվա նախօրեին՝ դեկտեմբերի 17-ին, տեղի ունեցավ «Ճամպրուկ» ամենամյա լրագրողական մրցույթի մրցանակաբաշխության արարողությունը:

Ամփոփիչ արդյունքներով՝ 4 լրագրողներ ճանաչվեցին հաղթողներ, ևս 5 լրագրողներ արժանացան խրախուսական մրցանակների:

Առաջին հորիզոնականում EVN report լրատվական գործակալության լրագրող Գոհար Աբրահամյանի «Օդից կախված. երբեմնի արցախաբնակների ոդիսականը» նյութն էր. հեղինակն ստացավ 500 հազար դրամ՝ որպես մրցանակ, ինչպես նաև «Ճամպրուկ 2021» մրցույթի խորհրդանշական բրոնզեձույլ արձանիկը:

Երկորդ հորիզոնականում Անահիտ Հարությունյանի «Մեզ պակասեց խելքը, դասերը չսովորելը». արցախցի երեխաների մտքերը» նյութն էր՝ հրապարակված Մեդիամաքս լրատվական գործակալությունում: Հեղինակն ստացավ 400 հազար դրամ՝ որպես մրցանակ:

Երրորդ հորիզոնականը զբաղեցրին երկու հեղինակներ. Տաթև Հարությունյանը՝ «Առավոտ» թերթից՝ իր «Միգրացիոն իրավիճակը Հայաստանում՝ միֆեր և իրականություն. փաստերի ստուգում» նյութով և Արեն Մելիքյանը՝ իր «Անցակետ «Զվարթնոց» podcast» շարքով: Հեղինակները, որպես մրցանակ, ստացան 300 հազարական դրամ:

Խրախուսական մրցանակի արժանացան հետևյալ նյութերը՝

Խրախուսական մրցանակը կազմում էր 150 հազար դրամ:

«Ճամպրուկ 2021» լրագրողական մրցույթին ներկայացվել էին 2020 թ. նոյեմբերի 15-ից մինչեւ 2021 թ. նոյեմբերի 30-ն ընկած ժամանակահատվածում հրապարակված մոտ 100 նյութեր՝ 44 հեղինակների կողմից՝ մոտ 40 տարբեր լրատվամիջոցներից` հետեւյալ թեմաներով.

  • ապաստանի համակարգ. փախստականներ, միջազգային պաշտպանություն և ինտեգրում ՀՀ-ում.
  • միգրացիոն գործընթացներ և միգրանտներ.
  • տեղահանություն և տեղահանված անձանց խնդիրներ։

 

«ՃԱՄՊՐՈՒԿ 2021» լրագրողական մրցույթի նպատակը թեմատիկ լուսաբանման ոլորտում լավագույն փորձը խրախուսելն է։ Հայաստանում փախստականների, տեղահանված անձանց և միգրանտների ու նրանց ինտեգրման գործընթացների վերաբերյալ գրագետ եւ ազդեցիկ մեդիա բովանդակությունը քաջալերելով՝ նպատակ ունենք ոգեշնչելու լրագրողներին՝ առավել ընդգրկուն, ճշմարիտ եւ անաչառ մոտեցումներ ցուցաբերելու տեղահանված անձանց և միգրանտների վերաբերյալ լրագրության և լուսաբանման գործում։

 

ՄԾ աշխատակիցները մասնակցեցին «Միգրացիոն կամուրջներ Եվրասիայում. COVID-19 դարաշրջանում նոր միգրացիոն իրողություն» ֆորումին

Հրապարակված է դեկ 13, 21

Միգրացիոն ծառայության միգրացիոն ծրագրերի և մոնիթորինգի բաժնի պետ Մարիա Ալլահվերդյանը, Միգրացիոն ծառայության պետի օգնական Նելլի Դավթյանը և ՄԱԿ-ի բնակչութան հիմնադրամի ժողովրդագրական ծրագրերի ղեկավար Աննա Հովհաննիսյանը դեկտեմբերի 8-9-ը Մոսկվայում մասնակցեցին «Միգրացիոն կամուրջներ Եվրասիայում. COVID-19 դարաշրջանում նոր միգրացիոն իրողություն» խորագրով 13-րդ միջազգային ֆորումին։

ՄԱԿ-ի բնակչութան հիմնադրամի և ՌԴ գիտության և բարձրագույն կրթության նախարարության Ժողովրդագրական հետազոտությունների ինստիտուտի աջակցությամբ կազմակերպված երկօրյա գործնական-ակադեմիական համաժողովին բացման խոսքով ելույթ ունեցավ Մոսկվայի Միջազգային հարաբերությունների պետական ինստիտուտի՝ կադրերի գծով պրոռեկտոր Վլադիմիր Մոռոզովը՝ կարևորելով միջոցառումը ինչպես ինստիտուստի ուսանողների համար, այնպես էլ միջազգային գործընկերների հետ համագործակցության տեսանկյունից։ Ժողովրդագրական հետազոտությունների ինստիտուտի տնօրեն, Ժողովրդագրական և միգրացիոն ֆակուլտետի ղեկավար Սերգեյ Ռյազանցևը ներկայացրեց աշխատըաժողովի հիմնական նպատակներն ու օրակարգերը։ Հնչեցին միգրացիայի և ժողովրդագրության թեմայով տարբեր զեկույցներ, իրենց գիտական աշխատանքները ներկայացրեցին մագիստրոսները։

Քննարկումների հիմնական թեմաները ՔՈՎԻԴ-19 համավարակի հետևանքով արձանագրված գլոբալ միտումներն էին միգրացիայի կառավարման ոլորտում, մասնավորապես՝ միգրացիոն հոսքերի կրճատում, զուգահեռաբար սահմանների փակման և կառավարման համատեքստում նույնական քաղաքականության բացակայության պայմաններում միգրանտներին առնչվող խնդիրների սրացում, անմիջականորեն միգրանտների վրա ազդող մի շարք սահմանափակումներ, պատվաստանյութերի փոխճանաչման և ՔՈՎԻԴ-19 թեսթավորման տարբեր կանոնակարգեր, ակադեմիական շարժունության կրճատում, աշխատաշուկաների փոխակերպումներ ինչպես համաշխարհային, այնպես էլ տարածաշրջանային և ազգային մակարդակներում, միաժամանակ միգրանտների դերի փոփոխություն զբաղվածության համակարգում:

Ըստ ներկայացված զեկույցների՝ համավարակի ազդեցությունը միգրացիայի կառավարման ոլորտում ավելի քիչ դրական ազդեցություն ունի (օրինակ, հեռավար արտասահմանյան կրթության պարագայում կրթական միգրանտի վերադարձի քաղաքականություն մշակելու անհրաժեշտությունը վերանում է), ավելի շատ՝ բացասական: Այս ազդեցությունները դրսևորվում են ինչպես էմիգրացիոն, այնպես էլ իմիգրացիոն հոսքերի ուղղությամբ: Էմիգրացիոն հոսքերի ուղղությամբ հիմնականում տեղեկատվական և հյուպատոսական հավելյալ ծառայությունների մատուցման կարիք է առաջանում, իմիգրացիոն հոսքերի ուղղությամբ՝ կոնկրետ կանոնակարգերի ներմուծման:

Քննարկված առողջապահական բնույթի մի շարք հարցերի թվում  էին իմիգրանտների, այդ թվում՝ փախստականների և ապաստան հայցողների հասանելիությունը պատվաստանյութերին, ինչպես նաև վարակից բուժումը, ինչը առաջարկվում էր կանոնակարգել առողջական ապահովագրության միջոցով:  

          Աշխատաժողովի մասնակիցները փաստեցին նաև, որ համավարակով պայմանավորված համաշխարհային միտում է նաև տնտեսության թվայնացման տեմպերի բազմապատկումը, դրան զուգահեռ աշխատանքային միգրացիայի հնարավորությունների սահմանափակումը: Արդյունքում, շատ միգրանտներ թվային տնտեսության մեջ ադապտացվելու և ինքնաիրացվելու խնդիր ունեցան: Համավարակի պայմաններում սահմանների կառավարման ոլորտում ևս շատ երկրներ կիրառում են թվային գործիքներ, որոնց հասանելիությունը միգրանտներին ապահովելը ևս համակարգային լուծում է պահանջում:

          Միջոցառման մասին մանրամասն տեղեկություններ հասանելի են  https://idrras.ru/news/2021/december/migration-bridges-in-eurasia-2021.html հղումով։

Ա․Ղազարյանը ՄՄԿ խորհրդի 112-րդ նիստին ներկայացրեց Հայաստանի փորձառությունը

Հրապարակված է նոյ 30, 21

Միգրացիոն ծառայության պետ Արմեն Ղազարյանն այսօր առցանց տարբերակով մասնակցեց ՄԱԿ-ի միգրացիայի միջազգային կազմակերպության (ՄՄԿ) խորհրդի 112-րդ նիստին՝ «ՔՈՎԻԴ-19-ի ազդեցությունը սահմանների վրա, միգրացիա և շարժունություն․ դասեր քաղելով և պատրաստվելով ապագային» թեմայով։ Նիստը կայացավ Ժնևում և նվիրված էր Կազմակերպության 70-րդ հոբելյանին։

Ա․ Ղազարյանը շնորհավորեց մասնակիցներին ՄՄԿ հիմնադրման 70-ամյակի առթիվ՝ նշելով, որ Կազմակերպությունը ՀՀ-ում գործունեություն է ծավալում 1993 թ-ից՝ նախաձեռնելով տարատեսակ ծրագրեր և էական ներդրում ունենալով միգրացիայի կառավարման և կայուն զարգացման գործում։ «Մենք բարձր ենք գնահատում ՄՄԿ աջակցությունը Հայաստանում Անվտանգ, կանոնավոր և ապահով միգրացիայի գլոբալ հռչակագրին համապատասխան միգրացիոն քաղաքականության մշակելու հարցում»,-նշեց նա։

Ղազարյանն անդրադարձավ համավարակով պայմանավորված իրավիճակին Հայաստանում, նշեց, որ համավարակի ամենասկզբից Կառավարությունն անհրաժեշտ քայլեր է ձեռնարկել՝ սահմանափակումների ժամանակահատվածում ապահովելով ՀՀ քաղաքացիների վերադարձը Հայաստան, ինչպես նաև ընդունել է վերադարձողների վերաինտեգրման առաջնային աջակցության ծրագիրը։ 

«Անցյալ տարին մեզ համար մարտահրավերներով լի էր ոչ միայն համավարակով պայմանավորված, այլ նաև Լեռնային Ղարաբաղի դեմ Ադրբեջանի կողմից սանձազերծված պատերազմի պատճառով, որը սպառնում էր ոչ միայն գլոբալ խաղաղությանն ու անվտանգությանը, այլև պատճառ դարձավ տարծաշրջանային մարդասիրական ճգնաժամի և զանգվածային տեղահանումների համար»,-նշեց Ա․Ղազարյանը՝ մանրամասնելով, որ ագրեսիայի հետևանքով ավելի քան 91 հազար անձ է տեղահանվել, որոնց 88 տոկոսը՝ կանայք և երեխաներ։

Եզրափակելով խոսքը՝ Արմեն Ղազարյանն անդրադարձավ միգրացիայի կառավարման ոլորտում թվայնացման գործընթացներին՝ մասնավորապես նշելով օտարերկրացիներին աշխատանքի թույլտվության նոր հարթակի գործարկումը։  «Վերջին փորձառությունը ցույց տվեց ներառական քաղաքականությունների արդյունավետությունը, որոնք կառուցված են համագործակցային մոդելով՝ կառավարությունների, միջազգային գործընկերների, քաղաքացիական հասարակության և այլ շահագրգիռ կողմերի միջև»,-ասաց նա։

 

Վերադարձի ոլորտում հայաստանյան փորձառությունը բարձր գնահատվեց ԵՄ գործընկերների կողմից

Հրապարակված է նոյ 25, 21

Միգրացիոն ծառայության պետ Արմեն Ղազարյանն այսօր մասնակցեց Վերադարձի և վերաինտեգրման եվրոպական ցանցի (ERRIN) բարձրաստիճան պաշտոնյաների 7-րդ կլոր սեղան քննարկմանը վերադարձի հարցերի վերաբերյալ։

Քննարկմանը մասնակցեցին ադամ պետությունների այն մարմինների ղեկավարները, որոնք լիազորված են մշակելու և իրականացնելու վերադարձի ոլորտի քաղաքականությունը, այդ թվում կամավոր վերադարձը և վերադարձից հետո իրականացվող գործընթացները։ Քննարկմանը դիտորդի կարգավիճակով մասնակցում էին նաև ERRIN-ի անդամ չհանդիսացող պետությունների միգրացիոն մարմինների պատասխանատուները։

Հանդիպման ընթացքում ներկայացվեցին ԵՄ անդամ-պետությունների արտաքին սահմաններում համագործակցության կառավարման եվրոպական գործակալության (FRONTEX) վերադարձի ոլորտում իրականացվող գործունեությունը և գործակալության աջակցությամբ անդամ պետություններում իրականացվող ծրագրերը։

ՄԾ պետ Արմեն Ղազարյանը, բարձր գնահատելով Վերադարձի և վերաինտեգրման եվրոպական ցանցի հայաստանյան ծրագրի արդյունավետությունը, նշեց, որ այն էական աջակցություն է ցուցաբերել վերջին տարիներին ԵՄ պետություններից Հայաստան վերադարձող քաղաքացիներին՝ նոր մակարդակի բարձրացնելով վերաինտեգրման փորձառությունը Հայաստանում։ «Մենք կուտակված փորձառության հիման վրա նաև պետական ինստիտուցիոնալ հիմքեր ստեղծեցինք և վերաիտեգրման առաջնային աջակցության ծրագիր մշակեցիք, որը երկու տարի է՝ իրականացնում ենք»,-փաստեց նա։

Նիդերլանդների Արդարադատության և անվտանգության նախարարության հայրենադարձության և վերադարձի ծառայության ղեկավար Յանիտա Ռոբերսը բարձր գնահատեց Հայաստանի փորձը՝ այն որակելով լավագույններից ոլորտում։ Քննարկման մյուս մասնակիցները ևս կարևորեցին հատկապես Հայաստանի միգրացիոն ծառայության ջանքերն ու հաջողությունները վերադարձի ոլորտում գործնական քայլերի, հետևողականության և ինստիտուտների ստեղծման ու զարգացման ուղղությամբ։

Պրահյան գործընթացների շրջանակում բարձրաստիճան պաշտոնյաները քննարկում են միգրացիոն հարցեր

Հրապարակված է նոյ 22, 21

Պրահյան գործընթացների անդամ երկրների բարձրաստիճան պաշտոնյաների մասնակցությամբ այսօր կայացավ առցանց հանդիպում՝ նվիրված Նախարարական հռչակագրի և գործողությունների ծրագրի քննարկմանը, որը պետք է ընդունվի հաջորդ տարում՝ Նախարարական համաժողովի ժամանակ։

Միգրացիոն ծառայությունից հանդիպմանը մասնակցեցին գլխավոր քարտուղար Համբարձում Աբրահամյանը և Վերադարձի և վերաինտեգրման բաժնի պետ Հայկանուշ Չոբանյանը։ «Ընդհանուր առմամբ մեզ համար ընդունելի են Նախարարական հռչակագրի և Պրահայի գործընթացի գործողությունների ծրագրի (2023-2027) տեքստերի աշխատանքային տարբերակները։ Մեր կարծիքով, միգրացիայի ոլորտում ճանաչված վեց թեմատիկ ոլորտները շարունակում են արդիական մնալ»,-նշեց Հ․ Աբրահամյանը՝ ընդգծելով միգրացիայի կառավարման արդյունավետության բարձրացմանն ուղղված հարցերի կարևորությունը։

Քննարկման մասնակիցները փոխանակվեցին տեսակետերով առկա միգրացիոն առանցքային մարտահրավերների վերաբերյալ։

 Առանձին քննարկումներ ծավալվեցին Աֆղանստանի ճգնաժամի և ՔՈՎԻԴ-19 համավարակի ազդեցությունների վերաբերյալ։

 

ՄԾ մասնագետները հանդիպեցին օտարերկրացիների աշխատանքի թույլտվության նոր հարթակի շահառու գործատուներին

Հրապարակված է նոյ 17, 21

Միգրացիոն ծառայության նախաձեռնությամբ այսօր տեղի ունեցավ օտարերկրացիների աշխատանքի թույլտվության տրամադրման և օտարերկրացիների հետ կնքված աշխատանքային պայմանագրերի հաշվառման էլեկտրոնային կառավարման հարթակի շահառու գործատուների ներկայացուցիչների հետ հանդիպում-քննարկում:

ՄԾ պետ Արմեն Ղազարյանը, ողջունելով հանդիպման մասնակիցներին, ներկայացրեց 2022 թ- հունվարի մեկից գործարկվելիք հարթակի կարևորությունը և առավելությունները նախկին համակարգի նկատմամբ: «Նոր էլեկտրոնային հարթակի գործարկմամբ նախ պարզեցվում է օտարերկրացիներին աշխատանքի թույլտվության ընթացակարգը և կրճատվում վարչարարությունը, և երկրորդը, գործընթացն ամբողջությամբ թվայնացվում է»,- նշեց նա:

ՄԾ պետի օգնական Վարդան Մաթևոսյանը ներկայացրեց համակարգի գործառույթներն ու հնարավորությունները: Ծրագրի իրավաբան խորհրդատուներ Տիրուհի Նազարեթյանն ու Աննա Բարիկյանը ներկայացրին հարթակի գործառնության իրավական հիմքերը և գործառույթների բաշխումը պետական մարմինների միջև:

ՄԾ մասնագետները պատասխանեցին գործատուների հարցերին, արձանագրեցին հնչած նկատառումները:

Աշխատանքի թույլտվության էլեկտրոնային հարթակի գործարկմանն աջակցում է ՄԱԿ-ի միգրացիայի միջազգային կազմակերպությունը:

ՄԾ պետ Արմեն Ղազարյանը Գերմանիայի գործընկերների հետ քննարկել է ռեադմիսիոն համագործակցությունը

Հրապարակված է նոյ 11, 21

Միգրացիոն ծառայության պետ Արմեն Ղազարյանը Գերմանիա կատարած աշխատանքային այցի շրջանակում հանդիպել է Բիլեֆելդ նահանգի օտարերկրացիների հարցերով կենտրոնական իշխանության ղեկավար Տորստեն Բյոլինգի հետ:

Հայաստանյան միջգերատեսչական պատվիրակությունը նոյեմբերի 9-11-ը Գերմանիայի Բիլեֆելդ քաղաքում է Հայաստանի Հանրապետության և Եվրոպական Միության միջև առանց թույլտվության  բնակվող  անձանց   հետընդունման (ռեադմիսիայի) համաձայնագրի շրջանակում աշխատանքային մի շարք հարցեր քննարկելու նպատակով:

Կողմերն այդ համատեքստում անդրադարձել են տարատեսակ տեխնիկական հարցերի, տարվող աշխատանքներն առավել արդյունավետ կազմակերպելու նպատակով քննարկել են հնարավոր տարբերակներ, գնահատել երկկողմ փորձառությունը միգրացիոն համագործակցության առումով, ինչպես նաև ռեադմիսիոն համաձայնագրի շրջանակում Հայաստանի կատարողականը, որը գերմանական կողմը խիստ բարձր է գնահատել: ՄԾ պետ Ա. Ղազարյանն ընդգծել է ԵՄ-ի հետ վիզաների ազատականացման շուրջ երկխոսության գործընթացի մեկնարկի կարևորությունը ՀՀ-ի համար:

Այցի շրջանակում ՄԾ պետը հանդիպել է նաև Վերադարձի և վերաինտեգրման եվրոպական ցանցի ծրագրի ղեկավար Մանֆրեդ Հեյնելին: Կողմերը փոխադարձ գոհունակություն են հայտնել բարձր մակարդակի համագործակցության առթիվ, արձանագրել են հայաստանյան ծրագրի երկարացման կարևորությունը: Ա. Ղազարյանը ներկայացրել է վերաինտեգրման առաջնային աջակցության պետական ծրագրի երկու տարվա արդյունքները, ընդգծել կազմակերպության (ERRIN) աջակցությամբ ՄԾ վերադարձի և վերաինտեգրման բաժնի աշխատակազմին վերապատրաստելու արդյունավետությունը:

Հայկական պատվիրակությանը ողջունելու էին եկել նաև Հյուսիսային Ռեյն Վեստֆալիա երկրամասի Ներքին գործերի նախարարության ներկայացուցիչները: Կողմերը կարևորել են պարբերական աշխատանքային քննարկումների անհրաժեշտությունը, միգրացիոն երկկողմ գործընթացներում փորձի փոխանակումը, հարաբերությունների շարունակական զարգացումը, ինչպես նաև համավարակով և այլ հանգամանքներով պայմանավորված վերադարձի ոլորտում առաջացած մարտահրավերների հաղթահարման ուղիները:

Հիշեցնենք, որ ՀՀ-ի և ԵՄ-ի  միջև ռեադմիսիայի մասին  համաձայնագիրը  ստորագրվել է  2013թ.-ի ապրիլի 19-ին, և  ուժի մեջ է մտել 2014թ. հունվարի 1-ից: Համաձայնագրի միջոցով պայմանավորվող կողմերի համար հնարավոր է դարձել փոխադարձության հիման վրա ստեղծել արագ և արդյունավետ իրավական ընթացակարգեր   կանոնակարգված վերադարձի կազմակերպման համար:

 

«ՃԱՄՊՐՈՒԿ 2021» լրագրողական ամենամյա մրցույթն ընդունում է մասնակցության հայտեր

Հրապարակված է նոյ 11, 21

ՀՀ Տարածքային կառավարման եւ ենթակառուցվածքների նախարարության Միգրացիոն ծառայությունը եւ Հայաստանում ՄԱԿ-ի Փախստականների գործակալությունը շարունակում են «ՃԱՄՊՐՈՒԿ» ամենամյա լրագրողական մրցույթի ավելի քան տասնամյա ավանդույթը։

Այս տարի մրցույթին կարող են ներկայացվել 2020 թ. նոյեմբերի 15-ից մինչեւ 2021 թ. նոյեմբերի 30-ն ընկած ժամանակահատվածում հրապարակված նյութերը՝ հետեւյալ թեմաներով.

  • ապաստանի համակարգ. փախստականներ, միջազգային պաշտպանություն և ինտեգրում ՀՀ-ում.
  • միգրացիոն գործընթացներ և միգրանտներ.
  • տեղահանություն և տեղահանված անձանց խնդիրներ։

Մրցույթին կարող են մասնակցել հեռուստատեսության, ռադիոյի, տպագիր մամուլի, էլեկտրոնային մեդիա ոլորտի բոլոր ժանրերում գործունեություն ծավալող լրագրողներ եւ թղթակիցներ, անկախ բլոգերներ, լուսանկարիչներ, մուլտիմեդիայի մասնագետներ։

Մրցույթի արդյունքների ամփոփմամբ կազդարարվեն 1-ին, 2-րդ եւ 3-րդ մրցանակների հաղթողները, ինչպես նաեւ կընտրվեն խրախուսական մրցանակների հաղթողները։

Մրցույթի մասնակիցների կողմից ներկայացված աշխատանքները կքննարկվեն ժյուրիի կողմից եւ կամփոփվեն մրցանակաբաշխության հանդիսավոր արարողությամբ՝

2021 թ. դեկտեմբերի 18-ին՝ Միգրանտների միջազգային օրը։

Նյութերն անհրաժեշտ է ուղարկել մինչեւ 2021 թ. նոյեմբերի 30-ը, ժ. 23։59, էլ-փոստի armye@unhcr.org եւ migrationservice.sms@mta.gov.am հասցեներով՝ պարտադիր նշելով հետեւյալը.

- հեղինակի անունը եւ ազգանունը,

- կոնտակտային տվյալներ (հեռախոսի համար, էլ-փոստի հասցե),

- հրապարակման ամսաթիվը, հղումը, հեղինակության լրացուցիչ հիմնավորում (եթե մասնակիցը տեսնում է դրա կարիքը),

- լրատվամիջոցի անվանումը։

Հարցերի դեպքում խնդրում ենք զանգահարել հետեւյալ հեռախոսահամարներով՝ 091 41 61 27, 091 52 02 54։

«ՃԱՄՊՐՈՒԿ 2021» լրագրողական մրցույթի նպատակը թեմատիկ լուսաբանման ոլորտում լավագույն փորձը խրախուսելն է։ Հայաստանում փախստականների, տեղահանված անձանց և միգրանտների ու նրանց ինտեգրման գործընթացների վերաբերյալ գրագետ եւ ազդեցիկ մեդիա բովանդակությունը քաջալերելով՝ նպատակ ունենք ոգեշնչելու լրագրողներին՝ առավել ընդգրկուն, ճշմարիտ եւ անաչառ մոտեցումներ ցուցաբերելու տեղահանված անձանց և միգրանտների վերաբերյալ լրագրության և լուսաբանման գործում։