ՀՀ ՆԳՆ միգրացիայի և քաղաքացիության ծառայության վերադարձի և վերաինտեգրման հարցերի բաժնի պետ Հայկանուշ Չոբանյանը հունիս 1-2-ը Ֆրանսիայի Հանրապետության Ստրասբուրգ քաղաքում Եվրոպայի խորհրդի Միգրացիայի և փախստականների հարցերի գլխավոր քարտուղարի հատուկ ներկայացուցչի հրավերով մասնակցել է Եվրոպայի խորհրդի Միգրացիայի հարցերով ազգային համակարգողների ցանցի 7-րդ հանդիպմանը։
Հանդիպմանը մասնակցում էին 43 անդամ պետությունների ներկայացուցիչներ, Եվրոպայի խորհրդի Միգրացիայի և փախստականների հարցերի գլխավոր քարտուղարի հատուկ ներկայացուցիչ և Միգրացիայի հարցերով ազգային համակարգողների ցանցի ղեկավար տիկին Լեյլա Կայաչիկը ներկայացրեց 2022թ-ին իրականացված աշխատանքները, որոնք հիմնականում փաստահավաք առաքելություններ են ուկրաինացի փախստականներ հյուրընկալող երկրներ՝ Ռումինիա, Լեհաստան, Չեխիա, Մոլդովա և Սլովակիա, տեղում ծանոթանալու իրավիճակին և երկրներին աջակցություն տրամադրելու նպատակով։
Հ․ Չոբանյանը ներկայացրել է Ուկրանիայից տեղահանված և Հայաստանում փախստականի կագավիճակ ստացած երեխաների, այդ թվում՝ առանց ուղեկցության և ընտանիքներից անջատված երեխաների վերաբերյալ վիճակագրական տվյալներ և նրանց ինտեգրման մարտահրավերները։ Նա նաև անդրադարձել է Հայաստանի միգրացիայի կառավարման ոլորտում վերջին զարգացումներին և ձեռքբերումներին: