«Մեդիա և միգրացիա 2022»․ Հրավիրում ենք մասնակցելու երկրորդ աշխատաժողովին (սեպտեմբերի 16-17, Աղվերան)

Հրապարակված է օգո 31, 22

Սիրելի՛ լրագրողներ, մեդիա դաշտի ներկայացուցիչներ,

Հրավիրում ենք ձեզ մասնակցելու «Մեդիա և միգրացիա 2022» ծրագրի շրջանակում կազմակերպվող երկրորդ աշխատաժողովին՝ իմիգրացիա և վերադարձ թեմաներով։

Աշխատաժողովը տեղի կունենա սեպտեմբերի 16-17-ին՝ «Պարկ Ռեզորթ Աղվերան» հյուրանոցում։

Աշխատաժողովի ընթացքում կներկայացվեն վերջին միտումները իմիգրացիայի ոլորտում, մասնավորապես օտարերկրացիներին աշխատանքի հիմքով կացության կարգավիճակի տրամադրման նոր համակարգը, ամփոփ վիճակագրական տվյալներ, ինչպես նաև վերադարձի և վերաինտեգրման ուղղությամբ տարվող աշխատանքները։ Մասնակիցները կթարմացնեն գիտելիքները նշված թեմաներով, կքննարկվեն ոլորտի լուսաբանման առանձնահատկությունները։

Աշխատաժողովի մասնակիցները քաջալերվում են մասնակցելու «Ճամպրուկ» ամենամյա լրագրողական մրցույթին։

Մասնակցության հայտ կարող են ներկայացնել գործող լրագրողները, անկախ լրագրողները, մեդիա դաշտի այլ ներկայացուցիչներ (լուսանկարիչ, մուլտիմեդիա մասնագետ, բլոգեր և այլն), ժուռնալիստիկայի ֆակուլտետի ավարտական կուրսում սովորող ուսանողներ՝ լրացնելով օնլայն հարցաթերթը մինչև սեպտեմբերի 6-ը: 

https://docs.google.com/.../1NRfeSlJtioPU7pdRYt4FwDT.../edit

Միջոցառումը կազմակերպվում է Միգրացիայի միջազգային կազմակերպության հետ համագործակցությամբ։

«Մեդիա և միգրացիա 2022» ծրագրի այս տարվա մեկնարկը տեղի ունեցավ ս․թ․ ապրիլի 29-ին՝ ԶԼՄ տնօրենների և գլխավոր խմբագիրների մասնակցությամբ, առաջին աշխատաժողովը՝ հուլիսի 7-8-ը փախստականների և ապաստանի թեմայով։

Ծրագրի երկարաժամկետ նպատակը Հայաստանում միգրացիոն գործընթացների վերաբերյալ որակյալ մեդիա բովանդակություն ստեղծելն է։

Ուշադրություն workpermit.am կայքի օգտատերերին

Հրապարակված է օգո 25, 22

Ուշադրություն workpermit.am կայքի օգտատերերին․

workpermit.am հարթակի հետ կապված հարցերով այսուհետ գործում է 060 275 021 հեռ․համարը։

Ծառայությունների մատուցումն այսուհետ իրականացվում է, Վազգեն Սարգսյան 3 հասցեում գտնվող Հանրային ծառայությունների միասնական գրասենյակից։ Միգրացիոն ծառայություն այցելելու անհրաժեշտություն չկա։

Հետևողական եղե՛ք Ձեր կողմից գրանցված էլ․փոստի հասցեին: Հարթակը ավտոմատ ծանուցում/ներ է ուղարկում։ Ծառայության մասնագետները ևս անհրաժեշտության դեպքում կապ են հաստատում Ձեր կողմից նշված կոնտակտային տվյալներով։ Արագ արձագանքելով ուղարկվող ծանուցումներին՝ Դուք աջակցում եք գործի վարման արագ ընթացքին։

Հարթակում գրանցվելուց հետո Դուք ստանում եք ավտոմատ ծանուցում բարեհաջող գրանցման մասին: Եթե այն չեք ստացել, խնդրում ենք ստուգել նաև փոստարկղի Spam բաժինը։

 ԵԱՏՄ անդամ պետության քաղաքացու գրանցումը հարթակում ինքնին դիմում է՝ բնակության օրինականությունը հավաստող փաստաթուղթ ստանալու վերաբերյալ։ Գրանցումից հետո պարզապես պետք է սպասել հետադարձ կապի։

Համակարգը վերջին ամիսներին աշխատում է ծանրաբեռնված ռեժիմով, որի հետևանքով հնարավոր են կացության կարգավիճակի տրամադրման ժամկետների որոշ խախտումներ։ Հայցում ենք Ձեր ներողամտությունը և շնորհակալ ենք փոխըմբռնման համար։

Հանրային ծառայությունների միասնական գրասենյակի մասնագետի հետ կարելի է կապ հաստատել 010 593921 հեռ․ համարով։

Էլ․փոստ: workpermit@gov.am

 Հանրային ծառայությունների միասնական գրասենյակի հասցեն քարտեզի վրա ցուցադրված է կից պատկերներում

Օգտակար տեղեկություն Ռուսաստանի Դաշնությունում գտնվող օտարերկրացիների, այդ թվում ՀՀ քաղաքացիների համար

Հրապարակված է օգո 23, 22

Այն օտարերկրացիները, այդ թվում ՀՀ քաղաքացիները, ովքեր

 մուտք են գործել Ռուսաստանի Դաշնություն մինչև 2021 թ-ի դեկտեմբերի 29-ը և առ այսօր գտնվում են Ռուսաստանում, առանց երկրից դուրս գալու և

 ՌԴ-ում են գտնվում ոչ աշխատանքային գործունեություն ծավալելու նպատակով՝ 90 օրը գերազանցող ժամկետով

 կամ ՌԴ-ում են գտնվում աշխատանքային գործունեություն ծավալելու նպատակով՝ անկախ գտնվելու ժամկետից,

 չունեն գտնվելու ժամանակավոր թույլտվություն (РВП), բնակության թույլտվություն (Вид на жительство) կամ քաղաքացիություն,

մինչև 2023 թ-ի հունվարի 10-ը պետք է անցնեն մատնահետքի (դակտիլոսկոպիկ) հաշվառում և լուսանկարում։

Մատնահետքի հաշվառման և լուսանկարման ընթացակարգերի մասին մանրամասն տեղեկություն հասանելի է https://migration.am/news/467 հղումով։

Նշված պահանջը սահմանվել է 2022 թ-ի հուլիսի 14-ի 357-Ֆ3 «Ռուսաստանի Դաշնությունում օտարերկրյա քաղաքացիների իրավական կարգավիճակի» մասին դաշնային օրենքով և ՌԴ առանձին օրենսդրական ակտերով։

Միգրացիոն ծառայության աշխատակազմը պարբերաբար վերապատրաստվում է

Հրապարակված է հուլ 21, 22

Միգրացիոն ծառայության աշխատակազմը պարբերաբար վերապատրաստվում է՝ մասնագիտական և ընդհանուր կարողությունները զարգացնելու նպատակով։

Վերջին շրջանում կազմակերպված դասընթացներն են եղել․

Հաղորդակցության հմտություններ, մասնակցել են Վերադարձի և վերաինտեգրման բաժնի աշխատակիցները, ինչպես նաև ոլորտի այլ կազմակերպությունների ներկայացուցիչներ։ Մասնակիցները սովորել են կառուցողական հարաբերություններ ստեղծել վերադարձած շահառուների հետ՝ հաշվի առնելով նրանց տրավմատիկ փորձառությունը։

Նախագծերի կառավարում, մասնակցել են Ծառայության տարբեր բաժինների աշխատակիցներ։ Սովորել են նախագծի ճիշտ պլանավորում, ռեսուրսների ուսումնասիրում, ժամանակի կառավարում, նախագծի սահմանների ճշտում, մոնիթորինգի իրականացում, գնահատում։

Անձնական տվյալների պաշտպանություն, մասնակցել են Ծառայության բաժինների ղեկավարները։ Դասընթացի ընթացքում բացատրվել է՝ ինչ է անձնական տվյալը, դրանք երրորդ անձին փոխանցելու կարգավորումները, անձնական տվյալների վերաբերյալ կետերը՝ Ապաստանի և փախստականների մասին ՀՀ օրենքում։

Անգլերենի վեցամսյա դասընթացներ, մասնակցում են նորաստեղծ Աշխատանքային միգրացիայի և մոնիթորինգի բաժնի աշխատակիցները՝ գործառույթի իրականացումը նկարագրող ուղեցույցի շրջանակում անգլերենով սահուն հաղորդակցվելու նպատակով։

Քաղաքացու սպասարկման հմտություններ, մասնակցել են Աշխատանքային միգրացիայի և մոնիթորինգի բաժնի աշխատակիցները։ Բացի տեսական նյութից մշակվել են նաև սպասարկման և հաղորդակցության ընթացակարգեր։

Առաջիկայում կմեկնարկի ռուսերենի երկամսյա դասընթացը՝ Աշխատանքային միգրացիայի և մոնիթորինգի բաժնի աշխատակիցների համար՝ գործառույթի իրականացումը նկարագրող ուղեցույցի շրջանակում ռուսերենով սահուն հաղորդակցվելու նպատակով։

Դասընթացները կազմակերպվել են Միգրացիոն քաղաքականության մշակման միջազգային կենտրոնի (ICMPD) կողմից իրականացված Վերադարձի և վերաինտեգրման եվրոպական ցանցի հայաստանյան ծրագրի, ինչպես նաև Միգրացիայի միջազգային կազմակերպության «Հայաստանում և Վրաստանում միգրանտների իրավունքների և լավ կառավարման խթանում» եռամյա տարածաշրջանային ծրագրի շրջանակներում։

Եվրոպական միգրացիոն ցանցի տարեկան համաժողովին

Հրապարակված է հուն 22, 22

Հայաստանի միգրացիոն ծառայության Վերադարձի և վերաինտեգրման հարցերի բաժնի պետ Հայկանուշ Չոբանյանը Փարիզում մասնակցում է Եվրոպական միգրացիոն ցանցի տարեկան համաժողովին, որը կազմակերպում է Ֆրանսիայի ներքին գործերի նախարարության օտարեկրացիների հարցերով գլխավոր գրասենյակի կողմից և նվիրված է կամավոր վերադարձի և վերաինտեգրման աջակցելու հարցերին։

Համաժողովում քննարկվող թեմաների առանցքում ԵՄ և ԵՄ անդամ չհանդիսացող երկրների մոտեցումները և եվրոպական համակարգման հարցերն են։

Համաժողովը կազմակերպված է չորս թեմատիկ բաժանմամբ․

  • ԵՄ քաղաքական և ֆինանսական շրջանակը,
  • Ուղղորդված կամավոր վերադարձի և վերաինտեգրման սխեմաների ավելի լավ փոխըմբռնում և գործակցություն,
  • Կամավոր վերադարձը խթանող մարտահրավերների և նորարարական փորձառության քարտեզագրում,
  • Վերաինտեգրման ծրագրեր, դեպի կայուն վերաինտեգրում:

Այս ձևաչափով հանդիպումը միավորում է քաղաքականություն մշակողներին, գործնական աշխատակիցներին՝ մասնագետներին, հետազոտողներին, հասարակական կազմակերպություններին և միջազգային կազմակերպություններին՝ ազգային և եվրոպական մակարդակներում։ Այն փորձի կառուցողական փոխանակման հարթակ ծառայելու նպատակ ունի:

Հ․ Չոբանյանը ներկայացրել է Հայաստանի վերաինտեգրման փորձը՝ պետական ծրագիրը, որն իրականացվում է երրորդ տարին անընդմեջ, ծրագրի շրջանակում կուտակված փորձը՝ շահառուների թիվը, բաշխվածությունը՝ ըստ վերադարձի երկրների, կարիքների ընդհանուր նկարագրությունը, ինչպես նաև ծրագրի ուղղորդիչ-խորհրդատվական և բնակվարձի փոխհատուցման բաղադրիչները։ Ոլորտի պատասխանատուն նշել է նաև, որ Հայաստանի միգրացիոն ծառայությունը աջակցում է նաև Ուկրաինայից վերադարձող ՀՀ քաղաքացիներին, ովքեր համապատասխանում են ծրագրի չափորոշիչներին․ ընտանիքում կա հաշմանդամություն ունեցող անդամ կամ ընտանիքը բազմազավակ է, ունի 4 կամ ավելի երեխաներ։

Համաժողովի շրջանակում այսօր ևս հանդիպում կա նախատեսված, որը նվիրված է Եվրոպական միգրացիոն ցանցի անդամ պետությունների ներկայացուցիչների գործակցության ամրապնդմանն ու խորացմանը։

 

Այսօր փախստականների համաշխարհային օրն է․2022-ի դրությամբ աշխարհում բռնի տեղահանված է ավելի քան 100 միլիոն մարդ

Հրապարակված է հուն 20, 22

Աշխարհում այսօր՝ հունիսի 20-ին, նշվում է Փախստականների համաշխարհային օրը։

Ըստ ՄԱԿ-ի փախստականների գլխավոր հանձնակատարի (ՄԱԿ ՓԳՀ/UNHCR) «Գլոբալ միտումների» տարեկան զեկույցի՝ 2021 թվականի վերջի դրությամբ պատերազմի, բռնության, հալածանքների և մարդու իրավունքների խախտումների հետևանքով տեղահանվածների թիվը կազմել է 89,3 միլիոն, ինչը 8 տոկոսով ավելի է նախորդ տարվա նույն ժամանակահատվածի համեմատ և կրկնապատկվել է 10 տարի առաջ գրանցված ցուցանիշի համեմատ:

Համաշխարհային բանկի տվյալներով՝ 2021 թ-ին 23 երկրներ՝ ընդհանուր 850 միլիոն բնակչությամբ, բախվել են միջին կամ բարձր ինտենսիվության հակամարտությունների․ նշված է ՄԱԿ ՓԳՀ-ի մամուլի հաղորդագրության մեջ։

Փախստականների (փախստականի իրավական կարգավիճակ ունեցողների) թիվը 2021 թվականին աճել է՝ հասնելով 27,1 միլիոնի։ Տեղահանվածների թիվը, ի թիվս այլ երկրների, բարձրացել է Ուգանդայում, Չադում և Սուդանում: Փախստականների մեծ մասը կրկին հյուրընկալվում է հարևան՝ սակավ ռեսուրսներով երկրներում: Ապաստան հայցողների թիվը հասել է 4,6 միլիոնի՝  ավելանալով 11 տոկոսով:

Հաղորդագրության մեջ նշվում է նաև, որ բռնության և կոնֆլիկտների հետևանքով տեղահանության ծավալները տարեցտարի աճում են, մինչդեռ  տեղահանված անձանց խնդիրների ուղղությամբ դեռ բավարար լուծումներ չկան, մասնավորապես վերադարձի, վերաբնակեցման կամ տեղում ինտեգրման հնարավորությունները։ Այնուամենայնիվ որոշ դրական միտումներ արձանագրվել են․փախստականների և ներքին տեղահանվածների վերադարձի ցուցանիշը 2021 թ-ին աճել է, 71 տոկոսով էլ աճել է կամավոր հայրենադարձության ցուցանիշը՝ մնալով այնուամենայնիվ փոքր։

Փախստականության համաշխարհային միտումների վերաբերյալ ընդհանուր պատկերացում տալու նպատակով ներկայացնում ենք նաև որոշ տվյալներ և փաստեր ՄԱԿ ՓԳՀ-ի գլոբալ զեկույցից․

  • 2022 թվականի մայիսի դրությամբ ավելի քան 100 միլիոն մարդ ամբողջ աշխարհում բռնի տեղահանված է հակամարտությունների, բռնությունների, մարդու իրավունքների խախտումների կամ հասարակական կարգը լրջորեն խախտող իրադարձությունների պատճառով:
  • 2021 թվականի վերջի դրությամբ այդ ցուցանիշը կազմել է 89,3 միլիոն, որը ներառում է.
    • 27,1 միլիոն փախստական, որից
      • 21,3 միլիոն փախստական՝ ՄԱԿ ՓԳՀ-ի մանդատի ներքո,
      • 5,8 միլիոն պաղեստինցի փախստական՝ ՄԱԿ-ի Պաղեստինի փախստականների օգնության և աշխատանքի գործակալության (UNRWA) մանդատի ներքո;
  • 53,2 մլն ներքին տեղահանված անձ,
  • 4,6 մլն ապաստան հայցողներ,
  • 4,4 միլիոն տեղահանված վենեսուելացիներ։

2021 թվականին տեղահանված անձանց վերաբերյալ․

  • Ցածր և միջին եկամուտ ունեցող երկրները հյուրընկալել են տեղահանվածների 83 տոկոսին,
  • Ամենաքիչ զարգացած երկրները ապաստան են տրամադրել ընդհանուր թվի 27 տոկոսին:
  • 72 տոկոսն հանգրվանել է իր ծագման երկրին հարևան երկրներում,
  • Փախստականների ամենամեծ ծավալը մեկ շնչի հաշվով ընդունել է Լիբանանը (1-ը 8-ի), որին հաջորդում են Հորդանանը (1-ը 14-ի) և Թուրքիան (1-ը 23-ի):
  • Տեղահանված փախստականների և վենեսուելացիների ավելի քան երկու երրորդը (69 տոկոս) եկել է ընդամենը հինգ երկրից՝ Սիրիա (6,8 միլիոն), Վենեսուելա (4,6 միլիոն), Աֆղանստան (2,7 միլիոն), Հարավային Սուդան (2,4 միլիոն) և Մյանմար (1,2 միլիոն):
  • 2021 թ-ին 1,4 միլիոն նոր ապաստանի հայց է ներկայացվել աշխարհում։ Ամերիկայի Միացյալ Նահանգները եղել է աշխարհում նոր անհատական ​​դիմումների ամենամեծ ստացողը (188,900), որին հաջորդում են Գերմանիան (148,200), Մեքսիկան (132,700), Կոստա Ռիկան (108,500) և Ֆրանսիան (90,200):
  • 2021 թվականին 5,7 միլիոն տեղահանված անձ վերադարձել է ծագման երկիր, այդ թվում՝ 5,3 միլիոն ներքին տեղահանվածներ և 429,300 փախստականներ։

 

ՄԱԿ ՓԳՀ-ի այս տարվա մամուլի հաղորդագրությունը Փախստականների համաշխարհային օրվա առթիվ հասանելի է հետևյալ հղումով՝ https://www.unhcr.org/news/press/2022/6/62a9d2b04/unhcr-global-displacement-hits-record-capping-decade-long-rising-trend.html

ՄԱԿ ՓԳՀ-ի «Գլոբալ միտումների» զեկույցը տարբեր լեզուներով հասանելի է հետևյալ հղումով՝ https://www.unhcr.org/unhcr-global-trends-2021-media-page.html

Զանգվածային լրատվության միջոցների համար օգտակար կոնտակտներ կարելի է գտնել հետևյալ հղումով՝ https://www.unhcr.org/international-media-contacts.html#media-contacts

Կայացավ վերաինտեգրման հիմնախնդիրներով զբաղվող կազմակերպությունների 13-րդ ֆորումը

Հրապարակված է մայ 27, 22

 

Հայաստան վերադարձող ՀՀ քաղաքացիների վերաինտեգրման հիմնա­խնդիրների շուրջ այսօր տեղի ունեցավ ոլորտի կազմակերպությունների ֆորումի հերթական` 13-րդ հանդիպումը:

Միգրացիոն ծառայության պետի տեղակալ Իրինա Դավթյանը նկատեց, որ եռամսյակային պարբերականությամբ կազմակերպվող այս ֆորումները արդյունավետ ձևաչափ է տեղեկություններով փոխանակվելու համար: «Բավականին նյութ է կուտակվել այս ընթացքում, որով փոխանակվելը օգտակար կլինի ոլորտում մեր ջանքերն ավելի արդյունավետ իրականացնելու համար»,-ասաց նա:

Միգրացիոն քաղաքականության մշակման միջազգային կենտրոնի (ՄՔՄՄԿ/ICMPD) հայաստանյան գրասենյակի ղեկավար Քարել Հոֆսթրան ևս կարևորեց հանդիպումը՝ նշելով, որ ՄՔՄՄԿ-ն ներկայացնելու կարևոր նյութեր ունի, այդ թվում Վերադարձի և վերաինտեգրման եվրոպական ցանցի (ERRIN)  հայաստանյան ծրագրի ամփոփումը, EU4Impact ծրագրի ընթացքը և նոր ծրագիրը վերադարձի ուղղությամբ, որ մեկնարկելու է առաջիկայում:

Կլինիկական հոգեբանության դոկտոր, ERRIN ծրագրի հոգեբան Լիլիթ Մնացականյանը ներկայացրեց իրականացրած աշխատանքները ինչպես Միգրացիոն ծառայության աշխատակազմի ուղղությամբ՝ վիկարային տրավմա, սահմանի պահպանում շահառուի հետ և այլն, այնպես էլ վերադարձող միգրանտների հետ՝ թերապիայի կուրսեր, խորհրդատվություն:

ERRIN ծրագրի կարողությունների զարգացման բաղադրիչի պատասխանատու Քրիստինա Գասպարյանը ներկայացրեց ծրագրի աջակցությամբ իրականացված փորձագիտական, հետազոտական աշխատանքները և դասընթացների շարքը՝ ուղղված Միգրացիոն ծառայության վերադարձի և վերաինտեգրման հարցերի բաժնի կարիքներին և կարողությունների զարգացմանը:

«Հայկական Կարիտաս» կազմակերպության վերադարձի ծրագրերի պատասխանատու Մովսես Հակոբյանը ներկայացրեց Եվրոպական սահմանային և առափնյա պահպանության գործակալության (FrontEx) կողմից իրականացվող վերաինտեգրման ծրագիրը, որը մեկնարկել է շուրջ երկու ամիս, սակայն դեռ աշխատակազմի վերապատրաստման փուլն է, և շահառուների ընդունելությունը կսկսվի առաջիկայում: Ծրագիրը Հայաստանում կիրականացվի 3 տարի ժամկետով, մեկ տարի երկարացվելու հնարավորությամբ, յուրաքանչյուր տարի մինչև 375 ընտանիքի աջակցելու ներուժով: «Աջակցության փաթեթը նման է նախկին ծրագրերի ներառումներին՝ սոցիալական, իրավական, բիզնեսի հիմնման աջակցություն՝ ըստ կարիքի»,-նշեց նա:  

Ֆորումին մասնակցում էին վերադարձի գործընթացներում ներգրավված պետական գերատեսչությունների ներկայացուցիչները՝ Արտաքին գործերի, Կրթության, գիտության, մշակույթի և սպորտի, Առողջապահության, Աշխատանքի և սոցիալական հարցերի նախարարություններից, միջազգային գործընկերները՝ ՀՀ-ում ԱՄՆ դեսպանությունից, Միգրացիայի միջազգային կազմակերպությունից, Հայաստանում Ֆրանսիայի իմիգրացիայի և ինտեգրման գրասենյակից (OFII), ինչպես նաև հասարակական կազմակերպությունների ներկայացուցիչները՝ Մարդը կարիքի մեջ, Հայկական Կարիտաս:

Ա.Ղազարյանը Նյու Յորքում մի շարք հանդիպումներ է ունեցել

Հրապարակված է մայ 23, 22

Միգրացիոն ծառայության պետ Արմեն Ղազարյանը Նյու Յորքում Միգրացիայի միջազգային դիտարկման ֆորումի շրջանակում երկկողմ հանդիպումներ է ունեցել Դանիայի պատվիրակութան՝ ի դեմս իմիգրացիայի եւ ինտեգրացիայի նախարարության պետքարտուղարի տեղակալ Հաննե Շտիգ Անդերսենի, Նիդերլանդների արտաքին գործերի նախարարության միգրացիայի հարցերով հատուկ բանագնաց Յուստ Կլարենբեեկի և Շվեդիայի Միջազգային զարգացման համագործակցության նախարարության պետքարտուղար Ջենի Օլսոնի հետ:
Կողմերի հետ Ա. Ղազարյանը քննարկել է ինչպես ընթացիկ, այնպես էլ հնարավոր համագործակցության հարցեր, ռեադմիսիոն գործընթացները, ներկայացրել է Հայաստանում ապաստանի համակարգը, մասնավորապես նոր հատուկ կացարանի շինարարությունը ապաստան հայցողների համար: Գործընկերները դիտարկել են Հայաստանում գործունեության շրջանակն ընդլայնելու հնարավորությունը:
Որպես միգրացիայի կառավարման ոլորտում Հայաստանի կառավարության առաջնահերթություն՝ Ղազարյանը շեշտադրել է գործընթացների թվայնացումը: 
Միջազգային գործընկերների հետ Ղազարյանը պայմանավորվածություններ է ձեռք բերել հետագայում ևս փորձի փոխանակման ուղղությամբ:

Միգրացիոն ծառայության պետը ՄԱԿ-ում ներկայացրեց Հայաստանում ոլորտի բարեփոխումների ընթացքը

Հրապարակված է մայ 20, 22

Միգրացիոն ծառայության պետ Արմեն Ղազարյանը ելույթ է ունեցել Նյու Յորքում ընթացող առաջին Միգրացիայի դիտարկման միջազգային ֆորումին՝ կարևորելով ֆորումի ձևաչափը՝ որպես Անվտանգ, կանոնավոր և ապահով միգրացիայի և Փախստականների մասին գլոբալ դաշնագրերի ընդունումից ի վեր միգրացիոն միտումներն ավելի լավ արտացոլելու և գլոբալ ջանքերը միավորելու հնարավորություն:

Նա նշեց, որ Միգրացիայի միջազգային կազմակերպության հետ սերտ համագործակցությամբ Հայաստանը առաջին անգամ 2020 թ-ին և երկրորդ անգամ այս տարի հաստատել է իր ազգային կամավոր զեկույցը՝ Անվտանգ, կանոնավոր և ապահով միգրացիայի գլոբալ դաշնագրի կատարման վերաբերյալ: «Հայաստանը շարունակական ջանքեր է գործադրում երկու դաշնագրերով սահմանված նպատակների իրականացման ուղղությամբ՝ բարելավելով միգրացիայի կառավարումն ու տեղահանված անձանց պաշտպանությունը»,- ընդգծեց Արմեն Ղազարյանը:

Հայաստանի միգրացիոն ծառայության պետը ներկայացրեց, որ Ծառայության կողմից վերջին շրջանում իրականացված լայնածավալ ծրագրերից մեկն ուղղված է փախստականի ձգձգված իրավիճակում հայտնված անձանց բնարանային ապահովման խնդրին՝ բնակարանի գնման վկայագրերի տրամադրման միջոցով: «Միևնույն ժամանակ մենք բախվել ենք տեղահանության ևս մեկ ալիքի՝ Լեռնային Ղարաբաղի բնակչության նկատմամբ դրսևորված ագրեսիայի և ուժի կիրառման հետևանքով: Արցախից տեղահանվածներից նշանակալի թվով  անձինք ապահով վերադարձի հնարավորություն կարող է չունենան՝ նույնիսկ հիմա՝ հրադադարի հաստատումից հետո»,- նշեց Արմեն Ղազարյանը՝ հավելելով Կառավարության կողմից ձեռնարկված աջակցության միջոցառումների մասին և շեշտելով, որ այս առումով Հայաստանի ջանքերը միանգամայն համընկնում են երկու դաշնագրերին՝ ամրապնդելով փախստականների ինքնուրույնությունը ու ընդունող հասարակություններում սոցիալական համերաշխությունը: Նա հատուկ կարևորեց միջազգային հանրության ներգրավվածությունն ու աջակցությունն այս համատեքստում:

Արմեն Ղազարյանն իր ելույթում անդրադարձավ նաև ՔՈՎԻԴ-19 համավարակի ազդեցությանը Հայաստանի վրա և ձեռնարկված միջոցառումներին, մասնավորապես միգրացիայի ոլորտում, ինչպես նաև այս համատեստքում արձանագրված վերադարձի միգրացիոն հոսքին:

Այնուհետև նա ներկայացրեց միգրացիայի կառավարման ոլորտում գործընթացների թվայնացման միտումները Հայաստանում՝ անդրադառնալով օտարերկրացիներին աշխատանքի թույլտվության և այդ հիմքով կացության կարգավիճակի տրամադրման համար գործարկված միասնական էլեկտրոնային հարթակին: Ղազարյանը շեշտեց, որ այն համահունչ է դաշնագրով սահմանած նպատակներին՝ դյուրացնել անհրաժեշտ փաստաթղթերին հասանելիությունը, ապահովել կանոնավոր միգրացիայի ուղիները և կանխարգելել թրաֆիքինգը:

«Մենք վերահաստատում ենք մեր հանձնառությունը բազմակողմանի ջանքերի և մարդու իրավունքների վրա հիմնված լուծումների ուղղությամբ՝ միգրացիայի և շարժունության ոլորտում ի հայտ եկող մարտահրավերներին դիմակայելու առումով»,- եզրափակեց իր խոսքը Հայաստանի միգրացիոն ծառայության պետ Արմեն Ղազարյանը:

Ընդհանուր քննարկման ժամանակ անդրադարձ կատարելով ադրբեջանական պատվիրակության ներկայացուցիչների արձագանքին՝ Միգրացիոն ծառայության պետը նկատեց, որ միգրացիային առնչվող ֆորումը այդ եզրույթի միտումների ու զարգացումների քննարկումների հարթակ է, այլ ոչ թե քարոզչության վերարտադրության վայր՝ ամբողջությամբ մերժելով նման դրսևորումները:

Միգրացիոն քաղաքականության մշակման միջազգային կենտրոնը կշարունակի աջակցել վերադարձի և վերաինտեգրման գործընթացներին Հայաստանում

Հրապարակված է մայ 17, 22

Միգրացիոն ծառայության (ՄԾ) պետի տեղակալ Իրինա Դավթյանն այսօր ընդունեց Միգրացիոն քաղաքականության մշակման միջազգային կենտրոնի (ՄՔՄՄԿ) միգրացիոն երկխոսությունների և համագործակցության գծով տնօրեն Մարտաին Փլյումի և ՄՔՄՄԿ հայաստանյան գրասենյակի ղեկավար Քարել Հոֆսթրային։

Կողմերն ամփոփեցին երկկողմ համագործակցության ընթացիկ փուլն ու քննարկեցին նոր ծրագրերը։ ՄԾ վերադարձի և վերաինտեգրման հարցերի բաժնի պետ Հայկանուշ Չոբանյանը ներկայացրեց վերադարձի ոլորտի առաջնահերթությունները, համագործակցությունը ինչպես միջազգային, այնպես էլ հասարակական հատվածի դերակատարների հետ։

Մ․ Փլյումը, ամփոփելով Վերադարձի և վերաինտեգրմնա եվրոպական ցանցի հայաստանյան ծրագիրը, հայտնեց, որ այն ավարտվում է ընթացիկ տարվա մայիսին, և ՄՔՄՄԿ-ն այս ուղղությամբ Հայաստանում կշարունակի գործունեություն ծավալել հուլիսի 1-ից նոր՝ Վերադարձի և վերաինտեգրման կառույցի ներքո։

«Վերադարձի և վերաինտեգրման եվրոպական ցանցի ծրագիրը Հայաստանում շատ ոգեշնչող էր, և մենք կշարունակենք աջակցել Հայաստանի կառավարությանն այս ուղղությամբ՝ պահպանելով կարողությունների զարգացման և վերադարձող միգրանտներին վերաինտեգրման աջակցության բաղադրիչները»,-նշեց նա՝ հավելելով, որ ծրագիրը կծառայի ոլորտի կարիքներին և եղած բացերին։