Կայացավ Վերադարձի և վերաինտեգրման հարցերով ֆորումի 11-րդ հանդիպումը

Հրապարակված է նոյ 10, 21

ՀՀ ՏԿԵՆ միգրացիոն ծառայության նախաձեռնությամբ և Միգրացիոն քաղաքականության մշակման միջազգային կենտրոնի (ICMPD) և Վերադարձի և վերաինտեգրման եվրոպական ցանցի (ERRIN Հայաստան) հետ համագործակցությամբ տեղի ունեցավ Վերադարձի և վերաինտեգրման հարցերով ֆորումի 11-րդ հանդիպումը, որին մասնակցում էին ինչպես պետական կառույցների, այնպես էլ միջազգային, հասարակական կազմակերպությունների ներկայացուցիչ­ներ։

Ողջույնի խոսք ասացին ՄԾ պետի տեղակալ Իրինա Դավթյանը և վերադարձի և վերաինտեգրման եվրոպական ցանցի ծրագրի ղեկավար Անկե Մերթենսը։

Ի․ Դավթյանը հակիրճ անդրա­դարձավ ոլորտի քաղաքականութ­յան հիմնախնդիրներին, ներկայացրեց «ՀՀ միգրացիոն քաղաքականության՝ ինտեգրման և վերաինտեգրման խնդիրների կարգավորման 2022-2032 թվականների ռազմավարության» նախագծի մշակման ուղղությամբ կատարված աշխատանքները, ինչպես նաև ներկայացրեց փաստաթղթով ամրագրված հիմնական ռազմավարական նպատակներն ու ուղղությունները։

ՄՔՄՄԿ կողմից իրականացվող «ERRIN Հայաստան» ծրագրի կարողությունների զարգացման բաղադրիչի պատասխանատու Քրիստինա Գասպարյանը ներկայացրեց 2021թ-ի հուլիս- հոկտեմբեր ամիսների ընթացքում կատարված աշխատանքները, որոնք ուղղված են միգրացիոն ծառայության մարդկային և տեխնիկական կարողությունների հզորացմանը։

«ERRIN Հայաստան» ծրագրի հոգեբան Լիլիթ Մնացականյանը ներկայացրեց ՄԾ աշխատակազմի հետ վերապատրաստման  և շահառուների հետ տարվող հոգեբանական աշխատանքները։

Միգրացիոն քաղաքականության մշակման միջազգային կենտրոնի ղեկավար Կարել Հոֆստրան և «ԵՄ-ն հանուն միգրանտների ներուժի օգտագործման՝ ի նպաստ Հայաստանի զարգացման. EU4IMPACT ARMENIA» ծրագրի պատասխանատու Անդրեյ Ափոյանը մանրամասն ներկայացրին ծրագիրը, որն ուղղված է աջակցելու միգրանտների (այդ թվում՝ աշխատանքային), վերադարձած միգրանտների և նրանց ընտանիքների անդամների կողմից արդեն իսկ հիմնադրված (սկսնակ) կամ ապագայում ստեղծվելիք բիզնեսների զարգացմանը:

Հանդիպման ընթացքում Ֆրանսիայի Ներգաղթի և ինտեգրման գրասենյակի (OFII) ներկայացուցչության տնօրեն Հյուգ Գեբհարթը և OFII-ի կողմից իրականացվող վերաինտեգրման ծրագրի պատասխանատու Վարդուհի Միքայելյանը ներկայացրին գրասենյակի աշխատանքները Հայաստանում, ինչպես նաև Ֆրանսիայից Հայաստան կամավոր վերադարձած քաղաքացիներին աջակցող ծրագրի շրջանակներում հաջողված պատմությունների վերաբերյալ տեսաշար։

Հանդիպման մասնակիցների միջև տեղի ունեցավ կլոր սեղան քննարկում, որի ընթացքում մասնակիցները ներկայացրին իրենց կազմակերպությունների կողմից իրականացվող ծրագրերում կատարված վերջին փոփոխություններն ու ընթացիկ զարգացումները։

 

Քննարկվում է Եվրոպական միգրացիոն ցանցում դիտորդի կարգավիճակով Հայաստանի անդամակցության հարցը

Հրապարակված է հոկ 25, 21

Հայաստանի միգրացիոն ծառայության աշխատակազմը` Ծառայության պետ Արմեն Ղազարյանի գլխավորությամբ, այսօր ընդունեց Եվրոպական միգրացիոն ցանցի պատվիրակությանը` քննարկելու Հայաստանի Հանրապետության` դիտորդի կարգավիճակով Ցանցին միանալու հնարավորությունը:

Եվրոպական միգրացիոն ցանցի նպատակը, որ սահմանվել է կազմակերպության խորհրդի որոշմամբ 2008 թ-ին, միգրացիայի և ապաստանի ոլորտների ինստիտուտների և անդամ երկրների իշխանությունների տեղեկատվական կարիքները բավարարելն է և ապահովելը անաչառ, արժանահավատ, թարմ և համադրելի տեղեկատվություն`  Եվրոպական միությունում քաղաքականություն մշակողներին աջակցելու նպատակով: Ցանցը կոչված է վստահելի տեղեկությունների աղբյուր հանդիսանալու նաև հանրության լայն շերտերի համար:

ՄԾ պետ Արմեն Ղազարյանը, ողջունելով հանդիպման մասնակիցներին, պատրաստակամություն հայտնեց կիսվելու հայաստանյան միգրացիոն փորձառությամբ, գործընթացների վերաբերյալ տեղեկատվությամբ և համապատասխանաբար ստանալու նաև տեղեկություններ Ցանցի գործունեության, կառուցվածքի և փորձառության մասին: «Այս հանդիպումը կարևոր է և' մեզ համար` հասկանալու Եվրոպական միգրացիայի ցանցին միանալու առավելությունները, դիտորդի կարգավիճակի առանձնահատկությունները, և' ձեզ համար` ծանոթանալու հայաստանյան փորձին, պատկերացում կազմելու մեր միգրացիայի և ապաստանի համակարգի վերաբերյալ»,-ասաց նա:

Եվրոպական միգրացիոն ցանցը անհրաժեշտության դեպքում արդյունավետ համագործակցային կապեր է ստեղծում ԵՄ անդամ երկրների և Եվրոպական հարևանության քաղաքականության անդամ այլ երկրների միջև:

Եվրոպական միգրացիայի ցանցի ներկայացուցիչ Ադոլֆո Սոմմարիբասը իր հերթին պատրաստակամություն հայտնեց անմիջական և թափանցիկ համագործակցություն հիմնելու համար: «Մեր փորձառությունը ցույց է տալիս, որ որքան սերտ, անմիջական և արագ են գործընկերների միջև շփումները, այնքան արդյունավետ է ստացվում համագործակցությունը: Ուստի մենք պատրաստ ենք քննարկելու բոլոր հարցերն ու փոխանակվելու փորձով, որպեսզի կայուն աշխատանքային կապեր ստեղծենք»,-ասաց նա:

Հանդիպումը կազմակերպվել է Միգրացիոն քաղաքականության մշակման միջազգային կենտրոնի հայաստանյան գրասենյակի աջակցությամբ: Գրասենյակի ղեկավար Քարել Հոֆթրան ևս կարևորեց դետալային քննարկումը՝ փորձի երկկողմ փոխանակման և անհրաժեշտ փաստերի արձանագրման համատեքստում:

2021 թ-ին Վրաստանն ու Մոլդովան Ցանցին միացել են որպես դիտորդներ:

 

ՄԾ պետ Ա.Ղազարյանը մասնակցում է ամենամյա միգրացիոն համաժողովին Վիեննայում

Հրապարակված է հոկ 20, 21

Միգրացիոն ծառայության պետ Արմեն Ղազարյանն աշխատանքային այցով Ավստրիայում է՝ մասնակցելու Վիեննայի 2021թ. միգրացիոն ամենամյա համաժողովին, որն այս տարի անցկացվում է  «Միգրացիոն գործընկերության վերանայում. մարտահրավերներ, հնարավորություններ և ռազմավարություններ» խորագրով։

Համաժողովին մասնակցում են ավելի քան 150 քաղաքական գործիչներ, բարձրաստիճան պաշտոնյաներ, փորձագետներ աշխարհի տարբեր երկրներից՝ մասամբ առցանց, մասամբ ներկա գտնվելով միջոցառմանը։

Փաստելով, որ միգրացիոն քաղաքականությունների ոլորտում արձանագրվել են մի շարք գլոբալ մարտահրավերներ, ինչպիսիք են ՔՈՎԻԴ-19 համավարակը, Աֆղանստանից տեղահանումները, գործընթացների թվայնացումը, Միգրացիոն քաղաքականության զարգացման միջազգային կենտրոնը կազմակերպել է այս լայնամասշտաբ քննարկումը՝ վերլուծելու ոլորտի միտումները երկարաժամկետ կտրվածքով, դերակատարների փոփոխությունները, մարտահրավերներին դիմակայելու, առավել ակտուալ ու խորքային լուծումներ գտնելու, համագործակցության ամրապնդման և առաջնահերթությունների վերասահմանման հարցերը։

Համաժողովին ողջույնի խոսքով հանդես եկավ ՄՔԶՄԿ գլխավոր քարտուղար Միխայիլ Շպինդելեգերը, ով շեշտեց հետ-քովիդի ժամանակաշրջանում այն մարտահրավերները, որոնք ակնկալվում են առաջիկայում, մասնավորապես զարգացած երկրներում աշխատանքային միգրանտների անհրաժեշտությունը, փոփոխվող ժողովրդագրական իրավիճակը, ինչպես նաև կլիմայի փոփոխությամբ առաջ եկող միգրացիոն խնդիրները:

Համաժողովի մեկնարկին ելույթով հանդես եկավ նաև Ավստրիայի ներքին գորխերի նախարար Կարլ Նեհամմերը, ով շեշտեց միգրանտների ծագման երկրներում, ինչպես նաև տրանզիտի երկրներում խնդիրների առաջնային կարգավորման անհրաժեշտությունը:

Ա․Ղազարյանը Վիեննայում հանդիպել է ՄՄԿ ներկայաուցիչների հետ

Հրապարակված է հոկ 19, 21

Միգրացիոն ծառայության պետ Արմեն Ղազարյանը, ով աշխատանքային այցով գտնվում է Վիեննայում, հանդիպել է ՄԱԿ-ի միգրացիայի միջազգային կազմակերպության (ՄՄԿ) տարածաշրջանային գրասենյակի ներկայացուցիչների հետ։

Հանդիպմանը մասնակցել են ՄՄԿ տարածաշրջանային միգրացիոն առողջության խորհրդատու Խայմե Կալդերոն, Իմիգրացիայի և սահմանների կառավարման ավագ փորձագետ Պիեռ Ռոսի Լոնգիի, Աշխատանքային միգրացիայի և մարդկային զարգացման ավագ փորձագետ Մայքլ Նյուսոնը, Քաղաքականության և կապի փորձագետ Ամր Թահան։

Կողմերը քննարկել են հայաստանյան միգրացիոն ոլորտի բարեփոխումները, մասնավորապես օտարերկրացիներին աշխատանքի թույլտվության նոր հարթակի գործարկումը 2022 թ-ի հունվարի մեկից, ինչպես նաև նախատեսվող ինստիտուցիոնալ փոփոխությունները, որ ամենամասշտաբայինն են լինելու Հայաստանի համար միգրացիայի ոլորտում։

Ա․Ղազարյանն ընդգծել է, որ ներկայացված գործընթացներում ՄՄԿ հայաստանյան գրասենյակը գործուն աջակցություն է ցուցաբերում, և սերտ համագործակցությունը նպաստում է համատեղ աշխատանքների իրականացմանը բարձր արդյունավետությամբ։

ՄՄԿ փորձագետները կիսվել են իրենց փորձառությամբ ինչպես իմիգրացիոն հոսքերի կառավարման, այնպես էլ մասնավորապես աշխատանքային միգրացիայի ոլորտի կանոնակարգերի մասով, փոխանակվել են կարծիքներով, պայմանավորվածություն ձեռք բերել հետագա համագործակցության վերաբերյալ։

Ա․Ղազարյանն ընդունել է ՀՀ-ում Շվեդիայի դեսպանին

Հրապարակված է հոկ 14, 21

ՀՀ ՏԿԵՆ միգրացիոն ծառայության պետ Արմեն Ղազարյանն այսօր ընդունեց ՀՀ-ում Շվեդիայի դեսպան Պատրիկ Սվենսոնին։

Քննարկվեցին երկկողմ համագործակցության հեռանկարները, մասնավորապես ոլորտին առնչվող հնարավոր համատեղ գործնական ծրագրեր, ինչպես նաև անդրադարձ եղավ Հայաստանի միգրացիոն իրավիճակին, Ծառայության գործառույթներին, ընթացիկ ծրագրերին։

Ա․ Ղազարյանը ներկայացրեց նաև ոլորտում բարեփոխումների ծրագրերը, որոնք վերաբերում են միգրացիայի ինստիցիոնալ համակարգի փոփոխություններին, թվայնացման գործընթացին, ապաստանի նոր կացարանի կառուցմանը։

Մեկնարկել է EU4IMPACT ծրագիրը

Հրապարակված է հոկ 05, 21

EU4IMPACT ծրագրի նպատակն է աջակցել միգրանտների (այդ թվում ՝ աշխատանքային), վերադարձած միգրանտների և նրանց ընտանիքների անդամների կողմից արդեն իսկ հիմնադրված (սկսնակ) կամ ապագայում ստեղծվելիք բիզնեսների զարգացմանը: Ծրագրի համապատասխան փուլերը հաջողությամբ ավարտելուն պես ծրագրի շահառուներն իրենց սեփական ներդրման գումարին հավասար չափով դրամաշնորհ ստանալու հնարավորություն կունենան: Ծրագիրն իրականացվում է Եվրոպական միության ֆինանսավորմամբ՝ Միգրացիոն քաղաքականության մշակման միջազգային կենտրոնի կողմից: Ծրագրի տևողությունը 48 ամիս է (2020 – 2024թթ.)։

Ո՞վ կարող է դիմել․

Ներկա պահին միգրանտ (այդ թվում ՝ աշխատանքային) հանդիսացող ՀՀ քաղաքացիները, որոնք վերջին երեք տարվա ընթացքում առնվազն մեկ տարի գտնվել են ՀՀ-ից դուրս (ցանկացած երկրում): Վերադարձած միգրանտներ. ՀՀ քաղաքացիներ, որոնք Հայաստան են վերադարձել վերջին երեք տարվա ընթացքում առնվազն մեկ տարի ՀՀ-ից դուրս (ցանկացած երկրում) գտնվելուց հետո3 : Միգրատների կամ վերադարձած միգրանտների ընտանիքների անդամներ (օր.՝ ՀՀ-ում բնակվող ծնողներ, զավակներ, ամուսիններ, քույրեր, եղբայրներ). ՀՀ քաղաքացիություն ունենալու պահանջը չի տարածվում ընտանիքի այն անդամների վրա, որոնք օրինական հիմքերով մշտապես բնակվում են ՀՀ-ում: Դիմորդները պետք է պատրաստ լինեն կատարել իրենց տրամադրման ենթակա դրամաշնորհին հավասար գումարի չափով ներդրում (համաֆինանսավորում), որը դրամաշնորհը ստանալու համար պարտադիր պայման է հանդիսանում:

 

Նշենք, որ ՄԱԿ-ի կողմից միգրանտը սահմանվում է որպես անձ, որը ավելի քան մեկ տարի բնակվել է օտարերկրյա պետությունում ՝ անկախ պատճառներից, կամավոր թե ոչ կամավոր, և անկախ միգրացիայի դիմելու համար օգտագործված միջոցներից՝ կանոնավոր թե անկանոն։

Իսկ աշխատանքային միգրացիան անձանց տեղաշարժն է մեկ պետությունից մեկ այլ պետություն կամ իրենց բնակության երկրի ներսում ՝ աշխատանք գտնելու նպատակով:

Աշխատանքային միգրանտը անձ է, որը պետք է զբաղվի, զբաղվում է կամ զբաղվել է վարձատրվող գործունեությամբ այն պետությունում, որի քաղաքացին չէ:

Օտարերկրյա պետությունում ուսում անցած (ուսանող)՝ վերը նշված պայմաններին համապատասխանող ՀՀ քաղաքացիները նույնպես կարող են մասնակցել ծրագրին:

 

Ծանոթություն. ներկայացված հայտադիմումների ուսումնասիրման և մասնակիցների ընտրության փուլի տևողությունը միջինում կկազմի 2-ից 3 ամիս: Բիզնես դասընթացների և բիզնես պլանի մշակման փուլի տևողությունը միջինում կկազմի մինչև 2 ամիս: Ծրագիրը գործում է ՀՀ ողջ տարածքում ՝ բացառությամբ ք. Երևանի: Ծրագրի շրջանակում սկսնակ բիզնես է համարվում այն բիզնեսը, որի հիմնադրումից (գրանցումից) անցել է ոչ ավել, քան երեք տարի: Ուստի, ծրագրի շահառու կարող են դառնալ ինչպես սկսնակ ձեռնարկատերերն, այդպես էլ արդեն որոշ ժամանակ գործող բիզնեսները:

 

Ինչպե՞ս դիմել․

1. Լրացրեք մասնակցության հայտն առցանց՝ հետևելով https://forms.gle/WYL23bemsbvA9SVS8 հղմանը կամ սկանավորելով QR կոդը: Մասնակցության հետ կապված բոլոր մանրամասներին կարող եք նաև ծանոթանալ մեր ծրագրի ֆեյսբուքյան էջերում (fb.com/ICMPDinArmenia և fb.com/EU4IMPACT),  ԻՐԻՍ բիզնես ինկուբատորի կայքէջերում (www.irisbi.am):

2. Հայտի հետ միասին որպես հավելվածներ կցեք.

  •  անձը հաստատող փաստաթղթի (անձնագրի) պատճենը՝ ներառյալ արտերկիր մուտքի վիզաները և ելքի/մուտքի կնիքները պարունակող էջերը (եթե միգրանտի ընտանիքի անդամ եք՝ ապա Ձեր անձնագրի պատճենը և միգրանտ անդամի անձնագրի պատճենը՝ ներառյալ արտերկիր մուտքի վիզաները և ելքի/մուտքի կնիքները պարունակող էջերը),
  •  Ձեր միգրացիոն պատմությունը հավաստող փաստաթղթերի (օր.՝ արտերկրում զբաղվածությունը հավաստող աշխատանքային պայմանագրերի) պատճենները, (եթե միգրանտի ընտանիքի անդամ եք՝ ապա այդ փաստը հավաստող փաստաթղթերի պատճենները),
  • աջակցվելիք բիզնեսի սեփականատերը (համասեփականատերը) հանդիսանալու փաստը հավաստող փաստաթղթի՝ պետական գրանցման վկայականի պատճենը (առկայության դեպքում),
  • Ձեր բանկային հաշվում համաֆինանսավորման համար անհրաժեշտ գումարի առկայությունը հավաստող ապացույցներ, ինչպես նաև տեղեկություններ, որոնք հաստատում են այդ ներդրման “միգրացիոն” ծագումը (օր.՝ արտերկրից դրամական փոխանցումների բանկային անդորրագրեր):

3. Սահմանված պահանջներին համապատասխանությունը հաստատվելուն պես Ձեզ հետ կանցկացվի հարցազրույց, որի արդյունքների հիման վրա կթույլատրվի Ձեր մասնակցությունը ծրագրի կողմից կազմակերպվելիք հատուկ դասընթացներին որոնք մշակվելու են՝ հաշվի առնելով դիմորդների անհատական կարիքները:

4. Դասընթացի ավարտին Դուք կհանձնեք թեստ, որից հետո Ձեզ կառաջարկվի երկու-երեք շաբաթվա ընթացքում կազմել անհատական բիզնես պլան, ինչում Ձեզ կօգնեն որակավորված մասնագետներ:

5. Անհատական բիզնես պլանի հիման վրա մշակված դրամաշնորհային առաջարկները կներկայացվեն մրցութային հանձնաժողովի գնահատմանն ու հաստատմանը: Հավանության արժանացած առաջարկներն ապա կարող են իրագործվել ծրագրի կողմից տրամադրված դրամաշնորհի և Ձեր կողմից ներդրված նույնչափ գումարի համադրմամբ:

6. Այնուհետ, ծրագրի որակավորված մասնագետները վեց ամսվա ընթացքում կհետևեն Ձեր ձեռնարկատիրական գործունեությանը և բիզնեսի զարգացման համար անհրաժեշտ խորհրդատվություն կտրամադրեն:

 

Ծանոթություն. ներկայացված հայտադիմումների ուսումնասիրման և մասնակիցների ընտրության փուլի տևողությունը միջինում կկազմի 2-ից 3 ամիս: Բիզնես դասընթացների և բիզնես պլանի մշակման փուլի տևողությունը միջինում կկազմի մինչև 2 ամիս:

 

Դրամաշնորհի չափը - 2.000 - 10.000 եվրո

• դրամաշնորհը պարտադիր պետք է համալրվի Ձեր կողմից հատկացվող նույն չափի գումարով,

• այն կարող է օգտագործվել բացառապես հիմնական միջոցների (գույք, արտադրամաս, տեխնիկական միջոցներ) և հումքի, ինչպես նաև բրենդավորման և/կամ փաթեթավորման ծառայությունների ձեռքբերման նպատակով:

Ձեռնարկատիրական գործունեություն, որը չի կարող ֆինանսավորվել ծրագրի շրջանակներում

• Առևտրային գործունեություն

• Մասնակցություն ներդրումային հիմնադրամներին

• Ֆինանսավարկային և ֆինանսական այլ գործունեություն

• Արտարժույթի փոխանակում

• Մոլեխաղերի կազմակերպում

Ա.Ղազարյանը Վիեննայում միջազգային գործընկերների հետ քննարկել է համագործակցությունը ընդլայնելու վերաբերյալ հարցեր

Հրապարակված է սեպ 09, 21

Սեպտեմբերի 8-11-ն աշխատանքային այցով Ավստրիայում գտնվող ՄԾ պետ Արմեն Ղազարյանը Վիեննայում հանդիպում է ունեցել Միգրացիոն քաղաքականության մշակման միջազգային կենտրոնի (ՄՔՄՄԿ) գլխամասային գրասենյակի Միգրացիոն երկխոսության և համագործակցության տնօրեն Մարթին Փլյումի և Արևելյան Եվրոպայի և Կենտրոնական Ասիայի տարածաշրջանային ղեկավար Վիոլետա Վագների հետ:

Կողմերը քննարկել են երկկողմ համագործակցությունն ու դրա շարունակականության հնարավորությունը: Ա. Ղազարյանը բարձր է գնահատել ՄՔՄՄԿ-ի նախաձեռնությամբ 2018 թ-ից ՄԾ-ում գործող ԷՐԻՆ ծրագրի արդյունավետությունը, որի շրջանակում շուրջ 1000 վերադարձողներ ստացել են վերաինտեգրման աջակցություն: ՄԾ պետը ներկայացրել է նաև նույն ծրագրի շրջանակում իրականացվող նախաձեռնությունը, որով ՄԾ վերադարձի և վերաինտեգրման աշխատակիցների, ինչպես նաև ոլորտին առնչվող այլ մասնագետների համար նախատեսվում է անցկացնել կարողությունների զարգացման դասըթնացների շարք:

Միջազգային կազմակերպության աջակցությամբ Հայաստանում իրականացվող արժեքավոր նախաձեռնությունների թվում է նաև 100-ից ավելի ապաստան հայցողների համար նախատեսվող նոր կացարանի շինարարությունը, ինչի կապակցությամբ ևս ՄԾ պետն իր գոհունակությունն է հայտնել գործընկերներին:

Մ. Փլյումի և Վ. Վագների հետ քննարկվել է ՄՔՄՄԿ-ի աջակցությամբ և ԵՄ-ի օժանդակությամբ Հայաստանում մեկնարկած IMPACT ծրագիրը, որի շրջանակում նախատեսվում է Հայաստան վերադարձող և աշխատանքային միգրանտներին  և նրանց ընտանիքի անդամներին ֆինանսական աջակցություն ցուցաբերել 1+1 սկզբունքով՝ սեփական ձեռներեցությունը հիմնելու նպատակով, որով նրանց միջոցները կուղղվեն հայրենիքում հիմնվելուն, տեղական զարգացմանն ու աշխատատեղերի ստեղծմանը:

 

Հայաստանում կներդրվի օտարերկրացիներին աշխատանքի թույլտվության տրամադրման նոր համակարգ

Հրապարակված է սեպ 08, 21

Հայաստանի միգրացիոն ծառայության նախաձեռնությամբ և ՄԱԿ-ի միգրացիայի միջազգային կազմակերպության աջակցությամբ այսօր տեղի ունեցավ միջգերատեսչական հանդիպում օտարերկրացիներին արդյունավետ և պարզեցված աշխատանքի թույլտվության համակարգի ներդրման թեմայով:

            Նոր համակարգը գործարկվելու է 2022 թ-ի հունվարի 1-ից: Առաջիկայում նախագիծը կդրվի հանրային քննարկման:  Օտարերկրացուն ներկայում աշխատանքի թույլտվություն տալիս է Աշխատանքի և սոցիալական հարցերի նախարարությունը, ինչի հիման վրա օտարերկրացին դիմում է Ոստիկանության անձնագրային ու վիզաների վարչություն՝ աշխատանքի հիմքով կացության կարգավիճակ ստանալու նպատակով: Նոր համակարգով այս գործընթացները միավորվում են ու ամբողջությամբ դառնում են էլեկտրոնային: Այդպիսով, դյուրացվում է գործատուի բեռը, քանի որ աշխատանքի թույլտվություն օտարերկրացուն տրվում է գործատուի դիմումի հիման վրա և այն պարագայում, երբ թափուր հաստիքը չի համալրվում ՀՀ քաղաքացի թեկնածուով: Նոր հարթակի ներդրմամբ կրճատվում են գործընթացի ժամկետները, դյուրացվում է անհրաժեշտ փաստաթղթերի ընդունումը, միևնույն հարթակում էլեկտրոնային եղանակով հասանելիություն են ստանում ոլորտի պետական կառույցները:

Քննարկմանը մասնակցում էին Աշխատանքի և սոցիալական հարցերի, Բարձր  տեխնոլոգիական արդյունաբերության, Էկոնոմիկայի, Կրթության, գիտության, մշակույթի և սպորտի նախարարությունների, Ազգային անվտանգության ծառայության, Ոստիկանության, Էլեկտրոնային կառավարման ենթակառուցվածքների ներդրման գրասենյակի ներկայացուցիչները, ինչպես նաև Միգրացիոն ծառայության, ՄԱԿ ՄՄԿ-ի աշխատակիցները, նախագծի հեղինակ փորձագետներն ու էլեկտրոնային համակարգի հեղինակ ծրագրավորողները:

Հանդիպման ընթացքում ծավալվեց ակտիվ քննարկում համակարգի գործարկման տարբեր սցենարների շուրջ: Ներկաները կիսվեցին իրենց փորձառությամբ, հնարավոր բարդություններով, հայտնեցին իրենց մտահոգությունները, իսկ նախաձեռնության հեղինակները առաջարկեցին բարձրաձայնված հարցերի հնարավոր արդյունավետ լուծումներն ու ի գիտություն ընդունեցին հնչած առաջարկները: Մինչև տարվա վերջ Միգրացիոն ծառայությունը կնախաձեռնի հանդիպումների շարք օտարերկրացի ներգրավելու փորձառություն ունեցող գործատուների հետ: Մասնագետները կներկայացնեն համակարգի գործառույթները, կարձանագրեն նաև շահառուների առաջարկներն ու կարծիքները:

2021Թ-Ի ԸՆԹԱՑՔՈՒՄ ԿՍԿՍՎԻ ԱՋԱԿՑՈՒԹՅԱՆ ՏՐԱՄԱԴՐՈՒՄ ՀՀ ՎԵՐԱԴԱՐՁՈՂՆԵՐԻՆ

Հրապարակված է փետ 17, 21

ՀՀ ՏԿԵՆ միգրացիոն ծառայությունում այսօր տեղի ունեցավ «Վերադարձի և վերաինտեգրման հարցերով» ֆորումի հերթական իններորդ հանդիպումը։

ՄԾ պետ Արմեն Ղազարյանը՝ ողջունելով ֆորումին ներկա գտնվող անդամ կազմակերպությունների ներկայացուցիչներին կարևորեց վերադարձի և վերաինտեգրման ոլորտում պետական մարմինների և հասարակական կազմակերպությունների համագործակցության խորացումն ու ներգրավվածութունը, ինչպես նաև անդրադարձ կատարեց առաջիկայում միգրացիոն ոլորտի ինստիտուցիոնալ փոփոխություններին:

Վերադարձի և վերաինտեգրման բաժնի պետ Հայկանուշ Չոբանյանը ներկայացրեց 2020թ-ի ընթացքում Միգրացիոն ծառայության կողմից իրականացված «ՀՀ վերադարձող քաղաքացիների առաջնային կարիքների բավարարմանն ուղղված պետական ծրագրի» արդյունքները։ Նա նաև տեղեկացրեց, որ նախապատրաստվել է ՀՀ կառավարություն նոր որոշման նախագիծ, որի հաստատումից հետո 2021թ-ի ընթացքում աջակցություն կսկսվի տրամադրվել ՀՀ վերադարձողներին։

Ֆորումի մասնակից միջազգային ու հասարակական կազմակերպությունների ներկայացուցիչները  ներկայացրեցին վերադարձի իրենց ծրագրերի շրջանակներում  վերջին զարգացումները, փոփոխություններն ու առաջիկա անելիքները։

ԲՆԱԿԱՐԱՆԻ ԳՆՄԱՆ ՎԿԱՅԱԳՐԵՐԻ ՏՐԱՄԱԴՐՈՒՄԸ ՓԱԽՍՏԱԿԱՆՆԵՐԻՆ ՇԱՐՈՒՆԱԿՎՈՒՄ Է

Հրապարակված է հուն 09, 20

Բնակարանի գնման վկայագրերի հերթական խմբաքանակը հանձնվեց Ադրբեջանից բռնագաղթած և 30 տարի անօթևան մնացած ընտանիքներին։ Կորոնավիրուսի վարակի տարածման հավանականությունը նվազեցնելու նպատակով և ելնելով այն հանգամանքից, որ շահառուները հիմնականում տարեց փախստականներ են, Միգրացոին ծառայության աշխատակիցներն անձամբ են հասցնում վկայագրերը բնակավայրեր։

Պայմանավորված արտակարգ դրություն հայտարարելու հանգամանքով՝  մինչև մայիսի 14-ը հատկացված ԲԳՎ-ների գործողության ժամկետը երկարաձգվել է շուրջ երկու ամսով, քանի որ տեղաշարժման սահմանափակումների պատճառով շահառուները չեն կարողացել իրացնել իրենց վկայագրերը։

Հիշեցնենք, որ ընթացիկ տարվա մայիսի 27-ին Կառավարությունն ընդունեց ծրագրի երկրորդ փուլի մասին որոշման նախագիծը, որով 2,1 միլիարդ դրամի շրջանակում ԲԳՎ-ներ կտրամադրվեն նույն թիրախային խմբի ևս 185 ընտանիքների։

Առաջին փուլին զուգահեռ արդեն մեկնարկել է երկրորդ փուլի շահառուների հաշվառման գործընթացը Երևան քաղաքի Կենտրոն, Էրեբունի, Նոր Նորք, Արաբկիր, Դավթաշեն վարչական շրջանների ժամանակավոր կացարաններում։

Արդյունքում, Երևան քաղաքի վարչական շրջաններում հերթականությամբ ամբողջությամբ և վերջնականապես  լուծվում են Ադրբեջանից բռնագաղթած ընտանիքների բնակարանային հարցերը: