ՀՀ կառավարության այսօրվա նիստում ընդունվեց «Հայաստանի Հանրապետության միգրացիայի պետական կառավարման հայեցակարգը և գործողությունների ծրագիրը հաստատելու մասին» որոշման նախագիծը։
Հայեցակարգի և գործողությունների ծրագրի նպատակն է միգրացիայի կառավարման ոլորտում ՀՀ կառավարության ստանձնած պարտավորությունների մեկտեղումը մեկ միասնական փաստաթղթում, ոլորտի կառավարման սկզբունքների սահմանումը և միգրացիոն քաղաքականության հիմնական ուղղությունների ձևակերպումը:
Վերջին տարիներին Հայաստանում աճում է օտարերկրացիների ներհոսքը՝ առաջ քաշելով միգրացիոն քաղաքականության նոր ուղղությունների ձևավորման անհրաժեշտություն. մասնավորապես՝ ներհոսքի կառավարում, օտարերկրացիների կացության և աշխատանքային գործունեության կանոնակարգում: 2019թ.-ին ՀՀ կառավարությունը հռչակել է ՀՀ ժողովրդագրական ռիսկերի կրճատման գերակա նպատակը՝ միգրացիոն քաղաքականության օրակարգ բերելով նաև միգրացիայի ժողովրդագրական ազդեցությունների կառավարումը:
2020 թվականի սեպտեմբերի 27-ին Ադրբեջանի Հանրապետության կողմից Արցախի Հանրապետության նկատմամբ սանձազերծված պատերազմը և նոր տեսակի կորոնավիրուսը (COVID-19) առաջացրին հարկադիր տաղահանվածների նոր խմբեր և միջազգային տեղաշարժի սահմանափակումներ,որոնք միգրացիոն քաղաքականության նոր մարտահրավերներ են:
Հայեցակարգը, հանդիսանալով ՀՀ միգրացիոն քաղաքականության հիմնարար և համապարփակ փաստաթուղթ, հիմք է հանդիսանալու իրենից բխող հետևյալ չորս ծրագրերի մշակման համար՝
- ինտեգրման և վերաինտեգրման խնդիրների կարգավորման,
- միգրացիոն հոսքերի կառավարման,
- հարկադիր միգրանտների զանգվածային ներհոսքի ճգնաժամային կառավարման
- հայրենադարձության խթանման:
Հիշեցնենք, որ ՀՀ բնակչության միգրացիայի կառավարման հայեցակարգ առաջին անգամ ընդունվել է 2000թ.-ին, որից հետո ՀՀ կառավարությունն ընդունել է չորս հայեցակարգեր և ռազմավարություններ ու գործողությունների երկու ծրագրեր, որոնցով սահմանվել են տվյալ ժամանակաշրջանի միգրացիոն քաղաքականության հիմնական ուղղությունները: