Միգրացիոն ծառայություն վերադարձի և վերաինտեգրման բաժնի պետ Հայկանուշ Չոբանյանն ու Հանրային կապերի պատասխանատու Նելլի Դավթյանը հանդիպում ունեցան Բելգիայի ապաստան հայցողների ընդունման դաշնային գործակալության (FEDASIL), Բելգիայի Կարիտաս բարեսիրական կազմակերպության և նույն երկրի Միգրացիայի միջազգային կազմակերպության ներկայացուցիչների հետ։
Հյուրերը ներկայացրին, որ 2016 թ-ից ի վեր իրականցնում են ծրագիր՝ ուղղված բժշկական խնդիրներով Բելգիայում անօրինական բնակված և վերադարձված օտարերկրացիների աջակցությանը, որում մասնակցություն ունեն նաև ապաստան հայցողներ Հայաստանից։
Հ. Չոբանյանը ներկայացրեց ՄԾ-ի մշակած վերաինտեգրման առաջնային աջակցության ծրագրի նախագիծը։ «Նախատեսում ենք բնակվարձի փոխհատուցման վեցամսյա սուբսիդիա տրամադրել ամենախոցելի ընտանիքներին, ինչպես նաև ստանձնել մեկ պատուհան ծառայության խորհրդատվական և ուղղորդիչ գործառույթներ»,-ասաց նա՝ հավելելով, որ ծրագիրը միջգերատեսչական քննարկումների փուլում է և շուտով ներկայացվելու է Կառավարություն։
Ն. Դավթյանը ներկայացրեց անօրինական միգրացիայի կանխարգելմանն ուղղված քայլերը՝ տեղեկատվական արշավների և քաղաքացիների իրազեկվածությունը բարձրացնելուն նվիրված միջոցառումների միջոցով։ «Սա նաև Հայաստան-ԵՄ համապարփակ և ընդլայնված գործընկերության համաձայնագրով սահմանված գործառույթ է, որի ուղղությամբ մենք աշխատում ենք՝ չխնայելով ոչ մի ջանք ու միջոց»,-ասաց նա։